Pagbaligya sa poppy seeds gipahunong

Friday, February 18, 2011

WALA pay kamandoan gikan sa kaulohan nga susihon ang mga establisimento ning siyudad nga naggamit og poppy seeds alang sa pastry products, matod sa Bureau of Food and Drugs sa Department of Health (DOH)-Northern Mindanao.

Apan ang personahi sa Food and Drugs Administration (FDA) nipasabot nga nagpaabot pa sila og direktiba gikan sa Manila sa dili pa magpahigayon og surprise inspection.

"Naay mga guidelines nga angay sundon ug dili basta-basta nga mag-conduct mi og inspection," pamahayag sa FDA personnel nga dili buot nganlan labina nga dili siya ang authorize officer nga magpagawas og pamahayag.

Ang FDA sa Manila nipahimangno sa mga establisimento nga ihunong sa kasamtangan ang pagbaligya og poppy seeds.

Samtang sa iyang bahin, si Chef Ed Dychauco, tag-iya sa Pots & Pans Home Bake & Coffe Shop ug sa samang higayon usa ka registered nurse nagkanayon nga dili mogamit ang mga community bakeries og poppy seeds aron ibutang sa ilang mga pan.

Matod niya nga maihap lang ang mga bakeshops nga mogamit og poppy seeds kay gawas nga mahal talagsaon usab kini nga sagol sa paghimo og cake, pan ingon man biskuwit.

"I use poppy seeds before but not anymore because aside from its price of P1, 000 per kilo you can buy this only in Manila," butyag ni Dychaucho sa Sun.Star Cagayan de Oro.

Kadto lang mga sosyal nga bakeshop ang maka-afford paggamit sa poppy seeds, dugang niini.

Gitin-aw usab ni Dychauco nga dili makadaot ug dili maka-adik ang poppy seeds kon isagol sa cakes ug ubang pastry products.

Hinuon, iyang gikumpirmar nga mapositibo sa drugs ang makakaon og pan, cakes ug uban pa nga dunay sagol nga poppy seeds apan mawala ra usab kini human sa 72 ka oras.

"Poppy seeds is normally use as toppings, I used to make poppy seeds cup cake before ug lami gyud siya, so far sa akong nahibaw-an ako lang ang nakagamit sa una," dugang ni Dychauco.

Apan kini namahayag nga walay makuha gikan sa mga establisimento ning siyudad ang FDA kon ugaling magpahigayon man og surprise inspection. (Annabelle L. Ricalde)

Gipatik sa mantalaang SuperBalita Cagayan de Oro Pebrero 19, 2011.